انیسواں کل ہندمسابقۂ حفظ وتجویدوتفسیرقرآن کریم بحسن وخوبی اختتام پذیر....... حاملینِ قرآن کریم اورعلمبردارانِ امن وامان کی صدائے دلنواز اورندائے دلگداز سے فضائے دہلی گونج اٹھی

قرآن کریم کتاب ہدایت اور قوم وملت کے لیے عظیم سرمایہ ہے۔اس کی تعلیمات کو عام کرنے کی آج کے اس پرفتن دور میں سب سے زیادہ ضرورت ہے۔ہم نے اس کے ذریعہ اس ملک کی بے مثال خدمت کی ہے۔آج اس کے علمی انکشافات کو واضح کرنے کی سخت ضرورت ہے۔اس کے ذریعہ امن وآشتی،اخوت وبھائی چارہ ، قومی یکجہتی کو فروغ حاصل ہوگا۔آپسی منافرت ،تشددپسندی اور دہشت گردی کا خاتمہ ہوگا ۔ان خیالات کا اظہار مرکزی جمعیت اہل حدیث ہند کے امیر مولانا اصغر علی امام مہدی سلفی نے کیا۔آپ مرکزی جمعیت اہل حدیث ہند کے زیراہتمام انیسویںکل ہندمسابقۂ حفظ تجویدوتفسیر قرآن کریم کے اختتامی اجلاس سے صدارتی خطاب فرمارہے تھے۔
امیر محترم نے اپنے صدارتی خطاب میں شرکائے مسابقہ سے خطاب کرتے ہوئے فرمایا کہ ضرورت اس بات کی ہے کہ ہم حقیقی حامل قرآن بنیں ،زمانہ ہماری رہنمائی کامنتظرہے۔ اگرہم قرآن کی انسانیت نواز تعلیمات کوصحیح معنوں میں اپنالیں توانسانیت کی کایا پلٹ سکتی ہے او روہ اس کی برکتوں سے مستفید ہوسکتی ہے۔ قرآن کریم کی تلاوت کرلینا یااس کو حفظ کرلیناسعادت کی بات ہے مگر اس کو اپنی رگ وپے میں بسانے اور اس کی تعلیمات کے مطابق زندگی گزارنے ہی سے اس کا حق ادا ہوسکتاہے۔آپ لوگوںنے اپنے سینوںمیں قرآن کریم کی دولت کومحفوظ کیا ہے اس کے لیے آپ مبارکباد کے مستحق ہیں۔میںآپ کو آپ کے والدین کو،آپ کے اساتذہ کو اورآپ کے محسنین مدارس کو مبارکباد دیتاہوں اور ان کا شکریہ اداکرتاہوں کہ ان کی محنت ولگن سے آپ نے یہ مقام حاصل کیاہے اوریہ ان کی نئی نسل کے تئیں فکرمندی کا ثبوت ہے۔آپ حضرات اپنے مقام ومرتبے کو پہچانیں اور اللہ جل شانہ کے انسانیت کے نام پیغام ودستور یعنی قرآن کریم سے وابستگی پرفخر محسوس کریں۔ہم جملہ ذمہ داران جمعیت آپ تمام شرکاء مسابقہ وحکم حضرات کا تہہ دل سے اس میں شرکت کے لیے شکریہ ادا کرتے ہیں اوربارگاہ رب دوعالم میںدعاگو ہیں کہ وہ ہم سب کو قرآن کریم کی تعلیمات پرعمل کرنے اورکماحقہ اس کی خدمت انجام دینے کی توفیق ارزانی فرمائے۔آمین

مرکزی جمعیت اہل حدیث ہند کے ناظم عمومی مولانا محمد ہارون سنابلی نے اپنے خطاب میں کہاکہ قرآن کریم عظیم کتاب ہے۔ اس کا پڑھنا اوراسے دوسروں تک پہنچاناہماری ذمہ داری ہے۔شرکاء مسابقہ قرآن کریم سے اپنا رشتہ قائم رکھیں اور اس کے تقاضوں کو پوراکریں۔آپ کا مقام بہت ہی بلند وبالاہے کیونکہ آپ نے قرآن کریم جو کہ کتاب ہدایت ہے اس کو اپنے سینوں میں محفوظ کیاہے ۔اس کتاب سے جس کا بھی تعلق قائم ہوا وہ عزت وشرف کے اعلیٰ مرتبے پر فائز ہوا۔یہ جس رات میں نازل ہوا وہ رات ہزار مہینوں سے افضل قرار پائی۔جو فرشتہ اسے لے کرآیا وہ روح الامین سے لقب سے ملقب ہوا۔آپ نے اس مسابقے میں شرکت کی اس کے لیے آپ مبارکباد کے مستحق ہیں، ساتھ ہی مرکزی جمعیت کی قیادت جس نے یہ محفل سجائی ہے وہ بھی مبارکباد کی مستحق ہے۔
شاہ ولی اللہ انسٹی ٹیوٹ کے صدرمولانا عطاء الرحمن قاسمی نے کہا کہ مرکزی جمعیت اہل حدیث ہند تعلیمی، رفاہی اور نوجوانوں کی ذہن سازی کے لئے قابل قدر خدمات انجام دے رہی ہے۔ترجمہ کا مسابقہ بڑی ہی اہمیت کا حامل ہے کیونکہ آج بھی ایک حلقہ قرآن کو سمجھ کر پڑھنے کو شجرممنوعہ قرار دیتاہے۔اس رسم کو توڑنے کی ضرورت ہے۔انہوںنے مرکزی جمعیت اہل حدیث ہند کے امیر حضرت مولانا اصغرعلی امام مہدی سلفی کواس مسابقہ ودیگربامقصد پروگراموں کے انعقا د پر دل کی گہرائیوں سے مبارکباد پیش کی ۔
جماعت اسلامی ہند کے نائب امیرسید امین الحسن نے مرکزی جمعیت کی قیادت کو دل کی گہرائیوں سے اس مسابقہ کے انعقاد پر مبارکبادپیش کی اورشرکاء مسابقہ سے خطاب کرتے ہوئے کہاکہ آپ اسلام کے نمائندے ہیں۔آپ کوقرآن کا تعارف پیش کرناہے۔قرآن ایک رہنماکتاب ہے اس کے اندربڑی تاثیرہے اس کی تلاوت سے آنکھیں اشک بار اوردل پگھل جاتے ہیں۔تبھی تو مشرکین مکہ شدیدترین مخالفت کے باوجود رات کی تاریکی میں اسے چھپ چھپ کر سنتے تھے۔ہمیں اس کی دعوت کو عام کرناہے اور اس کے پیغام کو پوری دنیاکے سامنے پیش کرناہے۔
انجمن منہاج رسول کے صدرسیداطہر حسین دہلوی نے شرکاء مسابقہ سے خطاب کرتے ہوئے کہاکہ جو طلبہ یہاں تشریف لائے ہیںان کو یہ بتانامقصودہے کہ اس کتاب کے پڑھنے ،سیکھنے اورسمجھنے سے وہ اللہ کے دربارمیںانعام کے ضرور مستحق قرار پائیں گے۔اورجن کو انعام ملے گا وہ تو مبارکباد کے مستحق ہیں ہی جن کو نہیں ملے گا وہ بھی مستحق ہیںکیونکہ انہوں نے اللہ کی کتاب قرآن کریم کے حفظ کا ایک عظیم کارنامہ انجام دیاہے۔ آپ نے ذمہ داران مرکزی جمعیت کو مسابقہ کے کامیاب انعقاد پر بھی مبارکباد پیش کی اورکہاکہ کوروناکے حالات میں بھی یہ مسابقہ منعقد کرکے جمعیت نے شاندارکام کیاہے۔
علماء کونسل صوبہ اتراکھنڈکے صدرمولانازاہدرضا رضوی نے کہاکہ آج کی اس پاکیزہ روحانی مجلس کے صدرمولانااصغرعلی امام مہدی سلفی،مولانامحمدہارون سنابلی،علماء کرام،اساتذہ وطلبہ سبھی کو دل کی گہرائیوں سے مبارکباد پیش کرتاہوں ۔جس نظم کے ساتھ جس ترتیب اورلگن اورذوق وشوق سے اس مسابقہ کو منعقدکیاگیاہے وہ قابل ستائش ہے۔سب سے زیادہ پڑھی جانے والی کتاب قرآن مجید ہے لیکن آج ہمارا اس سے تعلق مختصر یاٹوٹ ساگیاہے جس کے باعث پریشانیاں آرہی ہیں۔ شرکاء مسابقہ سے خطاب کرتے ہوئے کہاکہ جس ہمت مومنانہ سے آپ نے حالات کی ناسازی کے باوجودسفر کرکے اس مسابقہ میں حاضری دی ہے ،یہ بڑی بات ہے۔ اوراس مسابقہ میںجس فراخ دلی کا ثبوت دیاجاتاہے وہ جمعیت کا بڑاکارنامہ ہے ۔
مفتی افروز عالم قاسمی چیئرمین تعلیم جدید فاؤنڈیشن نئی دہلی نے اپنے تاثرات میں سب سے پہلے مرکزی جمعیت کی قیادت کو مبارکباد پیش کی اورکہاکہ قرآن کریم ہمارے لیے موجب ہدایت ہے اورآج کے ماحول میں عظیم رہنمابھی ہے۔ قرآن کا خاصہ ہے کہ وہ سب کے لیے ہدایت ہے ۔یہ مسابقہ قرآن سے شغف پیداکرنے کا اہم ذریعہ ہے۔اس سے ظاہری وباطنی انقلاب آئے گااورسرپرستوں کو اس کااجر دنیاوآخرت دونوں میں ملے گا۔
مسابقہ کے جملہ حکم حضرات کی نمائندگی اورذمہ داران سے اظہارتشکر کرتے ہوئے قاری حذیفہ قاسمی استاذمدرسہ عربیہ شمس العلوم شاہدرہ نئی دہلی نے امیرمحترم مولانااصغرعلی امام مہدی سلفی کا شکریہ اداکرتے ہوئے کہاکہ انہوں نے مجھے اس مسابقہ کا حکم بنایامیں اس کے لیے ان کا شکرگذارہوں۔جمعیت کی بالغ نظر قیادت اس پروگرام کو منعقد کررہی ہے تاکہ بندوں کا ان کے رب سے رشتہ استوار کیاجاسکے ۔مسابقہ کے حسن انتظام کی ستائش کرتے ہوئے کہا کہ جس حسن انتظام وبہترین قیام وطعام اور وسیع المشربی کے ساتھ یہ سلسلہ جاری وساری ہے اس کے لیے قیادت مزید شکریہ ومبارکباد کی مستحق ہے۔

سفارتخانہ سعودی عرب کے دینی امورکے ذمہ دار فضیلۃ الشیخ بدربن ناصر العنزی نے مسابقے کے اس اختتامی پروگرام میں شرکت پر خوشی کا اظہارکرتے ہوئے اسے اپنے لیے باعث شرف وسعادت بتایا اورذمہ داران جمعیت بالخصوص مرکزی جمعیت کے امیرمحترم شیخ اصغرعلی امام مہدی سلفی کااس مسابقہ کے انعقادنیزاسلام ومسلمانوں کی خدمت اورملک میںصحیح عقیدہ کی نشرواشاعت پرشکریہ اداکیااورکہاکہ قرآن کریم کے نزول کا سب سے بڑامقصد اللہ وحدہ لاشریک لہ کی عبادت، اس کے پسندیدہ دین کا قیام اورزندگی کے تمام گوشوں میں اس کی بالادستی قائم کرناہے۔اللہ تعالیٰ کا بے انتہا فضل وکرم ہے کہ اس نے اس قرآن کریم کو ہمیشہ کے لیے محفوظ کردیااوراس کی صیانت و حفاظت کا ایک اہم ذریعہ ان حفاظ کرام کو بھی بنایا جن کی عزت وہمت افزائی کاسامان اس جیسے مسابقات کے ذریعے فرمایا۔ان مسابقات کے فوائدمیںکتاب اللہ سے والہانہ شغف،اخلاق کی تہذیب اورفہم قرآن اوروسطیت واعتدال کاسامان موجودہے۔
شیخ محترم نے اپنے خطاب میں کہاکہ اللہ تعالیٰ نے سعودی عرب کی قیادت کوجہاں مسلمانوں کی گوناگوں خدمات،حرمین شریفین کی حفاظت اورحجاج کی خدمت کا شرف بخشاہے وہیںکتاب اللہ کی ہمہ جہت خدمات کے شرف سے بھی نوازاہے۔دنیاکی تمام زندہ زبانوں میں قرآن کریم کے ترجموں کی اشاعت سعودی عرب کا ناقابل فراموش کارنامہ ہے۔ہندوستانی مسلمانوں کے لیے انہوں نے ایک لاکھ قرآن کریم کے نسخے ہدیہ کیے ہیں۔اس سے وہاں کے حکمرانوں کے کتاب اللہ سے شغف کا پتہ چلتاہے۔
اختتامی پروگرام کے درمیان ہی میں مسابقہ کے پانچ زمروں کے اول پوزیشن لانے والے مشارکین نے اپنی بہترین آواز میں قرأت کے نمونے پیش کیے اورحاضرین کو اپنی قرأت سے محظوظ کیا۔
علاوہ ازیں مفتی جمعیت واستاذالمعہدالعالی للتخصص فی الدراسات الاسلامیہ شیخ جمیل احمدمدنی،رکن شوری مرکزی جمعیت اہل حدیث ہندڈاکٹر حافظ عبدالعزیزمدنی، صوبائی جمعیت اہل حدیث دہلی کے امیر مولانا عبدالستار سلفی،صوبائی جمعیت اہل حدیث جھارکھنڈ کے ناظم اعلیٰ وسابق ایم ایل اے مولانا عقیل اخترمکی، شہری جمعیت حیدرآباد،سکندرآباد کے امیرمولاناشفیق عالم خان جامعی ، مدرسہ تجوید القرآن آرکے پورم دہلی کے ناظم مولانامحمدقاسم رحیمی،جامعہ ریاض العلوم دہلی کے استاذمولاناعبدالاحد مدنی ،مولانا جلال الدین فیضی(ممبائی)،جناب محسن خان،ڈائریکٹر القلم انگلش اسکول ممبائی مولانامنظراحسن سلفی،مولانا محمودعالم فیضی وغیرہم نے اپنے تاثراتی کلمات پیش کئے او رانیسویں آل انڈیا مسابقہ حفظ وتجوید وتفسیر قرآن کریم کے کامیاب انعقاد پر مبارکباد پیش کی اورنیک خواہشات کا اظہار کیا۔نیز ہر قسم کے تعاون کی یقین دہانی کرائی۔ پروگرام میں شرکت کرنے والی دیگراہم شخصیات میںمولاناعزیزاحمد مدنی، حافظ شکیل احمدمیرٹھی قابل ذکرہیں۔
مسابقہ کے اختتامی پروگرام کا آغاز جامعۃ القرآن والسنۃ الخیریۃ بجنورکے استاذ اورمسابقہ کے حکم قاری عبدالنورصاحب کی تلاوت کلام پاک سے ہوا۔ مرکزی جمعیت اہل حدیث ہند کے نائب ناظم مولانا ریاض احمدسلفی نے نظامت کے فرائض انجام دیئے اورافتتاحی کلمات میں مرکزی جمعیت کی خدمات کا تعارف پیش کیا۔
مسابقہ میں امتیازی پوزیشن لانے والے سبھی چھ زمروں کے جملہ شرکاء کو نقدانعام ،گھڑی، بیش قیمت کتابوں کا تحفہ اورتوصیفی اسناد سے نوازاگیا۔ اس مسابقہ میںہندوستان کے طول وعرض سے بلاتفریق مسلک تقریباًساڑھے تین سو طلبہ متعدددینی وعصری اداروں کی نمائندگی کرتے ہوئے شریک ہوئے۔جن کو سند توصیفی کے ساتھ تشجیعی انعام گھڑی وکتب بھی دی گئیں۔
مرکزی جمعیت اہل حدیث ہند کے خازن الحاج وکیل پرویزنے آخر میں جملہ شرکاء مسابقہ،حکم حضرات، طلبہ، مقررین، مہمانان گرامی کاشکریہ اداکیا اوررات گیارہ بجے اس نورانی محفل کا اختتام ہوا۔
واضح ہوکہ اختتامی پروگرام گزشتہ کل بعد نماز مغرب جامع مسجد اہل حدیث کمپلیکس ،اوکھلا،نئی دہلی میں منعقدہوا جس میں ذمہ داران مرکزی وصوبائی جمعیات، ارکان مجلس عاملہ مرکزی جمعیت ،شرکاء مسابقہ،حکم حضرات ،ذمہ داران ملی تنظیمات،سرپرست حضرات اورشہرکے معززین کی بڑی تعداد نے شرکت کی۔